هذه الأغنية من تصميم "فطيمة الغناية." صممتها في زواج مجيد الفراتي بوردة الفراتي و زواج حمادي الفراتي بزبيدة الفراتي. و ذلك اثر فقدان أغلب رجال عائلة الفراتي ( من حومة اجيم - جربة ) ايام الحرب العالمية الثانية في صيف سنة 1941 حيث خرجت سفينتهم للمتاجرة الى تركيا و لم تعد. مات إثرها والدهم قهرا على أبنائه و لم يبقى في المنزل الا النساء و الأطفال. بعد بضعة سنوات و بالتحديد سنة 1955 , تم تزويج أبناء العم ببعضهم رغم صغر سنهم و هم في حالة إنتظار لعل يعود الأباء يوما. هذه الأغنية هي إهداء من فطيمة صديقة العائلة الى شاذلية و منانة و هن البنتان الوحيدتان المتبقيتان من عائلة الفراتي الى جانب زوجات المفقودين و أبنائهم .
أغنية أيام الحيرة .. أغنية من تراث جربة, تتحدث عن معاناة زوجة تم اعتقال زوجها و والده ايام الاستعمار أو أيام اعتقال اليوسفية (جاري البحث) فوجدت نفسها وحيدة مع ابنائها و أمام مسؤوليات جسيمة
اليوم الصباح وأنا نزن و نغني وحدي (كاتستروف فالصوت ما نحكيلكمش !!!) لاحضت الّي فمّا برشا إباحة فالغناء الجربي (التراث الغنائي الجربي) و قعدت نتسائل كيفاش كانو يغنيوهم فالعروسات قبل ؟؟ ياخي ما يحشموش ؟؟ وإلاّ زعمة ما كانش عندهم التخليط فالسهريات ؟؟ (وهو الأرجح) ما كانش فما تخليط بين الحمص والزبيب ؟؟ حاصيلو !!! هاو نص وحدة من الغنايات العديدة و أنتوما أحكمو وحدكم
ملاحظة : ال "ق" تتقرا بثلاث نقاط فوقها, على خاطر القا ماهيش موجودة فالقاموس الجربي. مرسول جاني متعني مرسول جاني متعني وصّل سلامي لحفصية قالتلي عمّي بجاه الله الحزّاره غابو جْملِيه
الحزّاره غابو و مشينا من رزق العالي تغدينا فرشنا الفراش تمدينا وشربنا ما جابت هيّا
وعدينا لويلة بعقلها عالسلسة مبروم غزلها تلوّحت بين بزازلها و حليت المحزم بإديّا
حليت المحزم و نحلٌه تفاح مع ورد بكلٌه كي درنا الأول و الثاني على عيون الناس البغضية
على عيون الناس الحزّارة نا ريدي مكحول أنضاره كي طحنا عالفرش سكارة طفلة صغيرة و مبلية
طفلة صغيرة و برداعي فالحين تعشق و تراعي نا حالف بيمين ذراعي لازم أندنّي الكيفية
و نخش معاها السهرية و نخش معاها تدفٌيني من ريق الشفايف ترويني دقوني دقات إيباري دقات سبول الجربية ...
أهل جربة مش الكلهم في جربة ... أهل جربة من كل بر في العالم منهم الجرابة بالأصل و المفصل و منهم الجرابة بالقلب.
كل العباد هذوما يجمعهم نفس الموقف و هوما يبداو في الجرف, يستنّاو في البطّاح : شوق كبيرو فرحة لا توصف.
الانسان وقتها يحس روحو كان متغرّب و يشوف سواحل جربة من بعيد و يشم هواء جربة الي يفحفح بعطر اللوتوس , يسكر وعصابه ترتاح.
مش ديما يقولوا "الي يدخل جربة يدخلها يبكي و الي يخرج من جربة يخرج منها يبكي ؟" .
يدخلها يبكي على خاطر يحس بالأيقاع البطيء متاع الجزيرة , وحدة وحدة, الساعة في جربة تحسها تدوم أربع ساعات و الجمعة تدوم شهر, وحدة وحدة كيف ريتم الشالة. و اذا ستانست بريتم جربة و حبيت موسيقتها و عبادها و هواها و بلايصها ...ما تنجم تخرج منها كان دموعك شرتلّة.
هالحكاية ماهيش أسطورة ... هالحكاية تحس بيها وقت الي البطاح يشب بيك لجربة تبدى تضحك و تتبسّم و قلبك يغصر عليك من الشوق ووقت الي البطّاح يطرّدك من الجزيرة, يعزّوك تقبل العزاء, الدمعة كان ما هبطتش تتحبس مع العبرة. تبدى خارجاتدز في ركايبك و تتلفت وراك و تقول "هو فما شكون يختار يخرج منالجنة ؟"
جربة يا جماعة عالم وحدو بألوانه بروايحه و خاصتا بايقاعه و هالايقاع يطبع في أهل البلاد فتلقاهم هاديين, الكلمة في بلاصتها و الحركة في بلاصتها, و الشطحة زادة في العروسات و الافراح تاخذ وقتها على موسيقى ريتمها طايح.
برشة صحابي مش جرابة يبهتوا و يضحكوا كيف يسمعوا غناية جربية و يقولوا "تشطحوا على الغناء هذا ؟ تي هاو يرقّد...". و تلقى الجربي وقتها وهو يسمع في هاك النغمة عظامه ترف و عينيه تلمع و ماذا بيه يعمل شطحة شالة.
و الشالة يا جماعة هو ريتم من الايقاعات الجربية الأصيلة الي يحبذوا الجرابة يرقصوا عليه.
نقترح عليكم في هالأطار غناية جربية جديدة (مش من التراث) تتحدث على نغمة الشالة و على مناطق جربة و حومها.
تحبوا تعرفوا رواحكم قابلين بش تكونوا جرابة و الا لا ؟ اسمعوا هالغناية, كان جلبتكم راهوا عندكم عرق جربي.
