أهل جربة مش الكلهم في جربة ... أهل جربة من كل بر في العالم منهم الجرابة بالأصل و المفصل و منهم الجرابة بالقلب.
كل العباد هذوما يجمعهم نفس الموقف و هوما يبداو في الجرف, يستنّاو في البطّاح : شوق كبيرو فرحة لا توصف.
الانسان وقتها يحس روحو كان متغرّب و يشوف سواحل جربة من بعيد و يشم هواء جربة الي يفحفح بعطر اللوتوس , يسكر وعصابه ترتاح.
مش ديما يقولوا "الي يدخل جربة يدخلها يبكي و الي يخرج من جربة يخرج منها يبكي ؟" .
يدخلها يبكي على خاطر يحس بالأيقاع البطيء متاع الجزيرة , وحدة وحدة, الساعة في جربة تحسها تدوم أربع ساعات و الجمعة تدوم شهر, وحدة وحدة كيف ريتم الشالة. و اذا ستانست بريتم جربة و حبيت موسيقتها و عبادها و هواها و بلايصها ...ما تنجم تخرج منها كان دموعك شرتلّة.
هالحكاية ماهيش أسطورة ... هالحكاية تحس بيها وقت الي البطاح يشب بيك لجربة تبدى تضحك و تتبسّم و قلبك يغصر عليك من الشوق و وقت الي البطّاح يطرّدك من الجزيرة, يعزّوك تقبل العزاء, الدمعة كان ما هبطتش تتحبس مع العبرة. تبدى خارج اتدز في ركايبك و تتلفت وراك و تقول "هو فما شكون يختار يخرج من الجنة ؟"
جربة يا جماعة عالم وحدو بألوانه بروايحه و خاصتا بايقاعه و هالايقاع يطبع في أهل البلاد فتلقاهم هاديين, الكلمة في بلاصتها و الحركة في بلاصتها, و الشطحة زادة في العروسات و الافراح تاخذ وقتها على موسيقى ريتمها طايح.
برشة صحابي مش جرابة يبهتوا و يضحكوا كيف يسمعوا غناية جربية و يقولوا "تشطحوا على الغناء هذا ؟ تي هاو يرقّد...". و تلقى الجربي وقتها وهو يسمع في هاك النغمة عظامه ترف و عينيه تلمع و ماذا بيه يعمل شطحة شالة.
و الشالة يا جماعة هو ريتم من الايقاعات الجربية الأصيلة الي يحبذوا الجرابة يرقصوا عليه.
نقترح عليكم في هالأطار غناية جربية جديدة (مش من التراث) تتحدث على نغمة الشالة و على مناطق جربة و حومها.
تحبوا تعرفوا رواحكم قابلين بش تكونوا جرابة و الا لا ؟ اسمعوا هالغناية, كان جلبتكم راهوا عندكم عرق جربي.
قوم و ارقص عالشالة
قوم و ارقص عالشالة *** نادي ولد الخالة
زغرط يا الحفالة *** على سيد الرجّالة
غير قوم أرقص هيا *** عالشالة الجربية
زغرط يا لوخيا *** مروح بالظلالة
تاوريت و بومالال *** سدغيان و الحشان
و مليتة في البال *** ومحافل قلالة
الرياض و سدويكش *** و والغ ما نسيتش
ما رقصتش و ما عييتش *** من محافل ربانة
مزران و بازيم *** القرع مع أجيم
حومة السوق شي عظيم *** جربة حلوة و مزيانة
الحدادة و المحبوبين *** و زيد القشعيين
بني معقل و البدوين *** فيها العمّة و الخالة
الليلة في ميدون *** حفلها كمون
جرجيسي ممحون *** على نغمة الشالة
*
7 commentaires:
3Lah hakka aman 7rektli mouaj3i:p et cette chanson que des souvenirs!!! merci;)
Djerba, cette ile merveilleuse...
Je suis d'origine de Mednine et je vis loin , Chaque fois que je rentre, je dois aller a Djerba...
Je suis pas Jerbi, mais plutot Jerbiable...
:)
Doghri Le Djerbien http://djerbien83.skyrock.com
Quand, comme moi ,on a passé son enfance dans les sillages vaporeux tabii blanc , bercé par leur charmant froufrou ; quand, comme moi,on a connu l'or fin des sables et le bleu sans fin de la mer ; quand on a gardé au plus profond de sa mémoire, comme une douce litanie, une somptueuse et fervente prière, le son du vent berçant les majestueux palmiers de mon ile, on ne peut se résoudre à laisser s'évanouir au loin le souvenir de cet Eldorado. Raviver les souvenirs de l'ile voir ressurgir dans nos yeux les images de nos Vaste Houchs blancs de notre douce et enchanteresse Jerba.
ana je suis djerbienne par l'estime et l amour ke je porte a des amies a moi djebiennes!! leurs familles aussi , je suis partie a djeba "midoune" chez eux et là g vécu des jours inoubliables des gens simples et si généreux !! en plus j adore les repas djebiens!! donc je suis jerbiable !! ça cé sure!!!
لكن مانيش عارفة علاش يقولو جربة ما تربي ناجح
ان نتنرفز برشا كيف نسمع هالكلمة
ça fé 2 mois ma rawa7tch l jerba ama zeyed m3a jerba l baya midoun houmt essouk tanit sidi jmour robbana el may gallala ...des souvenir inoubliable 7asssilo jerba l jraba
امان يفرحكم علاه معادش تكتبو على جربة
البلوق هذا كنز و احنا اللي بعاد على جربة نحبو نقراو ساعة ساعة حاجة كيما هكا نسمو عليها ريحة الجزيرة
ارجعو اكتبولنا وبارك الله فيكم
Enregistrer un commentaire