تدوينة بيضاء ... من أجل حقّنا في حرية التعبير

...
...
...
...
...
...
...
...
...
...
...
...
...
...
...
...
...
...
...
...
...
...
...

الإباحة فالغناء الجربي

اليوم الصباح وأنا نزن و نغني وحدي (كاتستروف فالصوت ما نحكيلكمش !!!) لاحضت الّي فمّا برشا إباحة فالغناء الجربي (التراث الغنائي الجربي) و قعدت نتسائل كيفاش كانو يغنيوهم فالعروسات قبل ؟؟ ياخي ما يحشموش ؟؟ وإلاّ زعمة ما كانش عندهم التخليط فالسهريات ؟؟ (وهو الأرجح) ما كانش فما تخليط بين الحمص والزبيب ؟؟
حاصيلو !!! هاو نص وحدة من الغنايات العديدة و أنتوما أحكمو وحدكم

ملاحظة : ال "ق" تتقرا بثلاث نقاط فوقها, على خاطر القا ماهيش موجودة فالقاموس الجربي.

مرسول جاني متعني

مرسول جاااني متعني
وصّل سلامي لحفصية
قالتلي عمّي بجاه الله
الحزّاره غابو جْملِيه

الحزّاره غابو و مشينا
من رزق العالي تغدينا
فرشنا الفراش تمدينا
وشربنا ما جابت هيّا

وعدينا لويلة بعقلها
عالسلسة مبروم غزلها (الطفلة شعرها مضفور)
تلوّحت بين بزااازلها
و حليت المحزم بإديّا

حليت المحزم و نحلاّ
تفاح مع ورد بكلاّ
كي درنا الأول و الثاني
على عيون الناس البغضية

على عيون الناس الحزّاره
نا ريدي مكحول أنضاره
كي طحنا عالفرش سكاره
طفلة صغيرة و مبلية

طفلة صغيرة و برداعي
فالحين تعشق و تراعي
نا حالف بيمين ذراعي
لازم أندنّي الكيفية

و نخش معاها السهرية
و نخش معاها تدفيني
من ريق الشفايف ترويني
دقوني دقات إيباري
دقات سبول الجربية
...

etes vous Jerbi(able) ?

أهل جربة مش الكلهم في جربة ... أهل جربة من كل بر في العالم منهم الجرابة بالأصل و المفصل و منهم الجرابة بالقلب.

كل العباد هذوما يجمعهم نفس الموقف و هوما يبداو في الجرف, يستنّاو في البطّاح : شوق كبيرو فرحة لا توصف.

الانسان وقتها يحس روحو كان متغرّب و يشوف سواحل جربة من بعيد و يشم هواء جربة الي يفحفح بعطر اللوتوس , يسكر وعصابه ترتاح.

مش ديما يقولوا "الي يدخل جربة يدخلها يبكي و الي يخرج من جربة يخرج منها يبكي ؟" .

يدخلها يبكي على خاطر يحس بالأيقاع البطيء متاع الجزيرة , وحدة وحدة, الساعة في جربة تحسها تدوم أربع ساعات و الجمعة تدوم شهر, وحدة وحدة كيف ريتم الشالة. و اذا ستانست بريتم جربة و حبيت موسيقتها و عبادها و هواها و بلايصها ...ما تنجم تخرج منها كان دموعك شرتلّة.

هالحكاية ماهيش أسطورة ... هالحكاية تحس بيها وقت الي البطاح يشب بيك لجربة تبدى تضحك و تتبسّم و قلبك يغصر عليك من الشوق و وقت الي البطّاح يطرّدك من الجزيرة, يعزّوك تقبل العزاء, الدمعة كان ما هبطتش تتحبس مع العبرة. تبدى خارج اتدز في ركايبك و تتلفت وراك و تقول "هو فما شكون يختار يخرج من الجنة ؟"

جربة يا جماعة عالم وحدو بألوانه بروايحه و خاصتا بايقاعه و هالايقاع يطبع في أهل البلاد فتلقاهم هاديين, الكلمة في بلاصتها و الحركة في بلاصتها, و الشطحة زادة في العروسات و الافراح تاخذ وقتها على موسيقى ريتمها طايح.

برشة صحابي مش جرابة يبهتوا و يضحكوا كيف يسمعوا غناية جربية و يقولوا "تشطحوا على الغناء هذا ؟ تي هاو يرقّد...". و تلقى الجربي وقتها وهو يسمع في هاك النغمة عظامه ترف و عينيه تلمع و ماذا بيه يعمل شطحة شالة.

و الشالة يا جماعة هو ريتم من الايقاعات الجربية الأصيلة الي يحبذوا الجرابة يرقصوا عليه.

نقترح عليكم في هالأطار غناية جربية جديدة (مش من التراث) تتحدث على نغمة الشالة و على مناطق جربة و حومها.

تحبوا تعرفوا رواحكم قابلين بش تكونوا جرابة و الا لا ؟ اسمعوا هالغناية, كان جلبتكم راهوا عندكم عرق جربي.

قوم و ارقص عالشالة

قوم و ارقص عالشالة *** نادي ولد الخالة

زغرط يا الحفالة *** على سيد الرجّالة

غير قوم أرقص هيا *** عالشالة الجربية

زغرط يا لوخيا *** مروح بالظلالة

تاوريت و بومالال *** سدغيان و الحشان

و مليتة في البال *** ومحافل قلالة

الرياض و سدويكش *** و والغ ما نسيتش

ما رقصتش و ما عييتش *** من محافل ربانة

مزران و بازيم *** القرع مع أجيم

حومة السوق شي عظيم *** جربة حلوة و مزيانة

الحدادة و المحبوبين *** و زيد القشعيين

بني معقل و البدوين *** فيها العمّة و الخالة

الليلة في ميدون *** حفلها كمون

جرجيسي ممحون *** على نغمة الشالة

*

الله مصلي عالنبي على جربة

ما انجمش نتحدث على جربة من غير ما ينتابني شعور غريب ... معبي بالحنين و الشوق و ألم البعد و عطر الذكريات.
هالمدونة هذه-يا جماعة- ما تتدعيش أنها بش تلم ذكريات هالجزيرة العظيمة بعظمة تاريخها و عبادها و ناسها, هالمدونة ماهي الا مجمع ذكريات شخصية تقرّب الجرابة من ذاكرتهم و تفتح ثقافة جربة عالناس من كل بر و بلاد.
هالمدونة تجمع الموسيقى الي تربينا عليها و الي –هي بيدها- تحكي برشة حكايات, و تجمع حكايات شخصيات عرفناهم أو سمعنا عليهم, حكاية بلايص نحبوهم, لهجة مش كيف اللهجات الاخرى و تجمع زادة أحداث تاريخية و عادات و تقاليد.
...

و نبداو كيما يبداو الشوشانات و الحفّالة في فروحاتنا, كيما يبدو أهل الفداوي حكاياتهم الغريبة العجيبة و كيما يبداو علماءنا و أهل الذكر بالصلاة على سيدي النبي. اللهم صلي عليه وبارك عدد معلوماتك و مداد كلماتك كلما ذكرك و ذكره الذاكرون وغفل عن ذكرك و ذكره الغافلون
سبحان ربك رب العزّة عما يصفون و سلام على المرسلين و الحمد للله رب العالمين.

صليو على محمد يا الناس الحاضرين

زيدوا صلوا عالامجد شفيع المؤمنين(1)

صليو على رسول الله محمد ابن عبد الله

هالنبي من زمزم يملى يروي في العطشانين

***

صليو على التهامي هو خير الأنام(2)

مصباحي في الظلام يضوي عالمؤمنين

***

قال له يا بابا هيّا حتى نودّع والديا(3)

امي العزيزة عليا يجعلها من الصابرين

***

قال له يا بابا أرجاني(4) حتى نودّع جيراني

نحكيلهم على قتلاني وذبحاني بالسكين

***

صليو عليه و زيدوا باش تربحوا و تفيدوا

جاب السكينة بيدوا باش يذبح اسماعيل

***

ابراهيم بيذبح(5) ولده جاب السكين في يده

جاه كبش الفدية من رب العالمين

***

يا عبد صيم وصلي وارجع للمولى.. ولّي(6)

لالدنيا بيك تخلي وتحتاج يوم الدين

(1) refrain

(2) الغناية تقول في هذا التسجيل "خير الأسامي" و الأصح هو "خير الأنام" يعني "خير خلق الله"

(3) الحديث هنا عن حكاية سيدنا ابراهيم. فمة مراوحة بين الصلاة على سيدنا محمد و سرد حكاية سيدنا ابراهيم عندما امر بذبح ابنه

(4) أرجاني : استناني , انتظرني. وهو لفظ مشتق من فعل "رجأ" ... أرجأ الامر , أخّره

(5) بنذبح : الجرابة يستعمل ال"ب" للتعبير عن المستقبل وله نفس وضيفة "بش نذبح " بالتونسي و "سأذبح" باللغة العربية الفصحى

(6) ولّي : أرجع .